Algoritmane ser deg

Dei fleste sosiale medium er styrte av algoritmar. Desse små dataprogramma styrer kva innlegg, stories og videoar du får sjå. Dei prøver heile tida å vise deg meir av det du liker. Målet er å få deg til å fortsette å skrolle.  

For å klare det, treng algoritmane informasjon om deg. Derfor samlar både sosiale medium og andre nettsider og appar inn informasjon om korleis du bruker dei. Dei lagrar blant anna kva lenker du klikkar på, og kor lenge du ser på kvart innlegg. Dei undersøker òg kva du legg ut sjølv. Både tekst, bilde og videoar.  

Sosiale medium, spel og andre nettsider bruker denne informasjonen til å vise deg reklame for ting algoritmane trur du vil like. Då er det større sjanse for at du får lyst til å kjøpe tinga. Mange firma betaler for at akkurat du skal sjå reklamen deira.